Fier, 22 Korrik 2025 Ministri i Drejtësisë, Ulsi Manja, ishte sot në Institucionin e Ekzekutimit të Vendimeve Penale (IEVP) Fier për të prezantuar një tjetër hap konkret në modernizimin e sistemit penitenciar në Shqipëri.
Gjatë vizitës, u bë dorëzimi i 15 autoambulancave të reja, të pajisura me teknologjinë më të avancuar mjekësore. Këto mjete do të përforcojnë flotën e transportit shëndetësor në burgje, duke garantuar standarde më të larta sigurie dhe trajtimi për të dënuarit dhe të paraburgosurit.
Në të njëjtën kohë, u përurua edhe rikonstruksioni i palestrës dhe fjetoreve të efektivëve të Policisë së Burgjeve, investim që synon të përmirësojë ndjeshëm kushtet e punës dhe jetesës për forcat që mbajnë rendin në sistemin penitenciar.
“Po investojmë për një sistem penitenciar më të sigurt, më funksional dhe më njerëzor. Shërbimi më cilësor dhe kushtet dinjitoze janë prioriteti ynë,” – u shpreh ministri Manja.
Këto masa janë pjesë e një strategjie më të gjerë të Ministrisë së Drejtësisë për modernizimin e sistemit të burgjeve në vend, me synim harmonizimin me standardet europiane dhe forcimin e të drejtave të të dënuarve dhe të punonjësve të sigurisë.
Leave a comment