Nga: nweslibero.com.
Në një kohë kur rrjetet sociale mbushen me spekulime dhe pretendime të pabazuara, e vërteta ka gjithmonë vlerë. Këtë javë, emri i ish-ambasadores amerikane në Shqipëri, Yuri Kim, është përdorur si objekt sulmi nga disa zëra të ekstremit të djathtë në rrjet, të cilët pa asnjë provë pretenduan se ajo ishte “pushuar nga puna” apo se “ishte larguar në heshtje nga Departamenti i Shtetit”.
E vërteta është krejt e kundërta.
Promovimi në një rol kyç në Washington!
Në mars 2025, Yuri Kim është emëruar Këshilltare e Lartë për Efiçencë dhe Përgjegjshmëri në Byronë për Çështjet Europiane dhe Euroaziatike pranë Departamentit Amerikan të Shtetit. Ky pozicion është pjesë e një strukture të re që synon të përmirësojë transparencën, efektivitetin dhe llogaridhënien në diplomacinë amerikane.
Pra, jo vetëm që nuk është shkarkuar, por është ngritur në detyrë.
Kjo është dëshmi e besimit që Uashingtoni zyrtar vazhdon të ketë ndaj profesionalizmit dhe integritetit të saj.
Nga Tirana në Uashington, gjithmonë në shërbim të Amerikës
Gjatë mandatit të saj në Shqipëri (2020–2023), Yuri Kim la një ndikim të dukshëm në mbështetje të reformave, luftës kundër korrupsionit dhe forcimit të marrëdhënieve mes dy vendeve. Shumëkush në Shqipëri e pa si zërin e SHBA-ve për një demokraci më të fortë, dhe jo si palë me ndonjë forcë politike.
Fatkeqësisht, kjo e ka bërë edhe shënjestër për sulme të pabaza, sidomos nga grupime politike të frustruara prej qëndrimeve të saj të qarta kundër pandëshkueshmërisë dhe korrupsionit.
Sulmet në Facebook? Dezinformim dhe manipulim i qëllimshëm.
Një postim i fundit në rrjetin social Facebook, i cili është shpërndarë në disa faqe anonime dhe politike, pretendon se “administrata Trump e pushoi nga puna” dhe se “punoi për Edi Ramën”. Asnjëra nga këto nuk është e vërtetë.
Në fakt, Yuri Kim u emërua ambasadore në Shqipëri pikërisht nga administrata Trump, dhe asnjë dokument zyrtar nuk mbështet pretendimin se ajo është “pushuar”.
Përkundrazi, Departamenti i Shtetit e ka rikthyer profilin e saj në faqen zyrtare me rolin e ri të vitit 2025, duke hedhur poshtë çdo pretendim për “largim në heshtje”.
Ylli që vazhdon të shkëlqejë!
Sot, Yuri Kim është një nga diplomatet më të respektuara amerikane në fushën e çështjeve europiane dhe euroaziatike. Në një kohë kur fake news tenton të errësojë figurat e ndritura, ajo vazhdon të qëndrojë e palëkundur në majën e besimit diplomatik dhe shtetëror.
Nëse ka një mesazh që na mëson historia e saj, është ky: Faktet ngadhënjejnë mbi propagandën. Dhe shërbimi ndaj vlerave nuk ndalet, pavarësisht zërave që kërkojnë ta njollosin.
Leave a comment