Nga: Arkitekti Arlind Rusto
Si arkitekt dhe si njohës i ligjeve të urbanistikës, si ish nëpunës me një eksperiencë 3-vjeçare në administratën vendore, ndjej sot detyrimin moral dhe qytetar të reagoj publikisht për këtë situatë që po bëhet gjithnjë e më absurde.
Nuk e bëj këtë reagim si polemikë, por si një sinjal alarmi për çdo qytetar që e ka kaluar në kurriz të vet se çfarë funksionon dhe çfarë është kalbur brenda bashkive dhe zyrave të urbanistikës dhe kontrollit territorit.
Mos u çudisni nga sjellja dhe reagimi i Kryeministrit për zaptimet dhe ndërtimet pa leje. Reagime më të ashpra do të vijnë në këtë drejtim — sepse kjo nuk është një situatë rastësore, por pasojë e një zinxhiri të kalbur që askush s’e shkul dot me fjalë.
Dyshimi i vetëm që mbetet është nëse ky zgjim i KM do të jetë efikas per të c’bërë njëher e mirë sëmundjen apo do të mbesë thjesht një fushatë demonstrim force ndaj atyre të korruptuar që duhet të dorëzojnë karriget nën këtë presion për disa të tjerë që u ka ardhur radha pas fushatës zgjedhore për t’u provuar si më pak të korruptuar?!
Për sa kohë administratat vendore janë të tej mbushura me të paaftë, servila, rryshfetxhinj, gjobvënës, garipa partie që gjatë fushatave kërkonin më zë të lartë e të pacipë mosfunksionimin e policisë dhe kontrollit të territorit per të bërë shtesa kati, papafingo dhe zaptime të ambjenteve publike me zgjerime biznesesh, kjo që po ndodh është vetëm hapja e kutisë së pandorës!
Skandalet sa vijnë e do thellohen. Do të shohim çudira.
Sepse problemi nuk është një individ — por zinxhiri i paaftësisë dhe korrupsionit, që nuk ndahet dot nga pushteti lokal.
Por a do të guxojë KM ta ndëshkojë këtë zinxhir të dështuar realisht?
A do të guxojë të pranojë publikisht se bashkitë, drejtori pas drejtorie, janë kthyer në prona private, ku gjithçka zgjidhet me para apo me presion?
A do t’i thotë dot qytetarit të ndershëm që vuan me muaj për një leje ndërtimi njëkatëshe në fshat, që i njëjti shtet që ja nxinë me një seri ecejake burokratike dhe që s’do ti japë leje pa rryshfet, është kthyer në lehtësues të zaptuesve dhe spekulantëve?
Pra problemi është se për të sulmuar këtë situatë, duhet të pranosh fillimisht dështimin e zinxhirit të funksionimit të administratës vendore.A do të ndëshkohen drejtorat e korruptuar që kanë shpërdoruar postin me veprimet dhe mosveprimet e tyre?! A funksionojnë këta drejtora pa miratimin e kryetareve të bashkive apo edhe emërimet e tyre përzgjidhen me lupë vetëm për ti shërbyer kryetarit dhe mbrohen fortë nga kryetarët që zinxhiri i korrupsionit të shkojë deri tek firma e kryetarit në tavolinën e punës, e cila jo pak herë bëhet hallka më eficente e konstituimit të sorollatjes për qytetaret?!
Ajo cfare ndodhë perditë është fare e thjeshtë dhe ndjehet nga të gjithë:
•Në administratë mungojnë profesionistët.
•Korrupsioni dhe rryshfeti është i vetmi sistem që të kursen “KOHEN” dhe të shpëton nga stresi i sorollatjes.
•Kontrolli është mpirë ose është bërë palë me korrupsionin.
•Ligji ka rënë
Sot qytetari i ndershëm sorollatet, ndërsa ndërtuesi i paligjshëm merr “ok” me një telefonatë.
Nëse Kryeministri do të zgjidhë realisht këtë kancer, le të fillojë duke ndëshkuar zyrat, jo vetëm karriget që shemben me propagandë.
Sepse ndërtimi pa leje është pasojë — administrata e korruptuar është burimi.
Leave a comment