Analisti dhe drejtuesi i emisionit “360 Gradë” u shua në Sarandë pas një problemi shëndetësor.
Sarandë, 23 gusht 2025 – Një nga figurat më të njohura të gazetarisë dhe analizës politike shqiptare, Artur Zheji, është ndarë nga jeta në moshën 63-vjeçare.
Ngjarja ka ndodhur në orët e para të mëngjesit në qytetin bregdetar të Sarandës, ku gazetari ndodhej me familjen. Sipas informacioneve paraprake nga Policia dhe burime mjekësore, ai ka ndjerë probleme shëndetësore dhe është transportuar drejt Spitalit Rajonal të Sarandës, por fatkeqësisht nuk ka mundur të mbijetojë gjatë rrugës.
Artur Zheji ishte një figurë publike me ndikim në median shqiptare. Ai njihej për emisionin “360 Gradë”, për analizat e thella politike dhe qasjen kritike ndaj zhvillimeve në vend. Me një karrierë mbi 30-vjeçare, Zheji ka qenë aktiv si gazetar, redaktor, analist, si dhe ka dhënë kontribut në publicistikë dhe letërsi.
Zheji ishte djali i gjuhëtarit dhe studiuesit të shquar Petro Zheji, dhe i aktores Besa Imami. Ai u vlerësua ndër vite si një zë i pavarur dhe i guximshëm në debatin publik
Leave a comment