Një ngjarje e shënuar dhe plot bekim u zhvillua në qytetin e Lushnjes, ku u kremtua shugurimi meshtarak i Dom Gaitano Lleshaj, një moment i veçantë për Kishën Katolike në Shqipëri, dhe në mënyrë të posaçme për Administraturën Apostolike të Shqipërisë së Jugut.Ky është shugurimi i parë meshtarak në historinë e Kishës së Jugut, duke e bërë këtë ditë një ngjarje të paharrueshme për gjithë komunitetin e besimtarëve.Dom Gaitano Lleshaj ka kryer studimet e tij teologjike në Seminarin Ndërdioqezan “Nëna e Këshillit të Mirë” në Shkodër, ndërsa formimin e mëtejshëm e ka përfunduar në Istitutin Teologjik “Leonianum” në rajonin e Lazios, Romë një qendër e njohur akademike e formimit kishtar.Aktualisht, ai shërben si Kancelar i Administraturës Apostolike të Shqipërisë së Jugut, ku ipeshkëv është Mons. Giovanni Peragine, dhe njihet për përkushtimin e tij ndaj Kishës dhe komunitetit të besimtarëve.Në ceremoninë e shugurimit morën pjesë meshtarë dhe besimtarë të shumtë nga jugu i vendit, por edhe nga shumë zona të tjera të Shqipërisë e jashtë saj, duke dëshmuar unitetin dhe gjallërinë shpirtërore të Kishës.Në këtë ngjarje të rëndësishme ishin të pranishëm edhe përfaqësues të trupit diplomatik, ndër ta Zëvendëskonsulli i Italisë në Vlorë, z. Antonio Rapisardi, si dhe i Ngarkuari me Punë i Ambasadës së Vatikanit në Tiranë, Mons. Ionut Paul Strejac.Nga autoritetet fetare mori pjesë përfaqësuesi i Kishës Ortodokse, At Leonardi, duke dëshmuar frymën e dialogut dhe bashkëpunimit ndërfetar që karakterizon komunitetet fetare në Shqipëri.Ky shugurim përbën një moment shprese dhe rilindjeje shpirtërore për Kishën e Jugut, e cila vazhdon të rritet me thirrje të reja dëshmi e gjallë e besimit, dashurisë dhe shërbesës ndaj Zotit dhe njerëzve.Në përfundim të ceremonisë, Dom Gaitano Lleshaj shprehu mirënjohjen e tij të thellë ndaj Zotit, familjes, bashkësisë së besimtarëve dhe të gjithë atyre që e kanë mbështetur në rrugëtimin shpirtëror.Ai theksoi se thirrja meshtarake është një dhuratë e madhe dhe një mision që kërkon përkushtim, dashuri dhe përulësi, duke ftuar të rinjtë që të jenë të hapur ndaj zërit të Zotit në jetën e tyre. “T’i shërbesh Zotit do të thotë t’i shërbesh njeriut me dashuri dhe besim.Kisha është shtëpia jonë e përbashkët, ku secili gjen paqe dhe shpresë,” u shpreh Dom Gaitano Lleshaj në fjalën e tij të parë si meshtar.
Leave a comment