Nga: Anila Pepa, Korespondente e Newslibero.com në Milano
Në një nga lagjet më elegante të Torinos ndodhet di muzeu “Camera”, një hapësirë e dedikuar
tërësisht fotografisë. Këtë vjeshtë, një ndër sallat kryesore mikpret ekspozitën e një fotografeje jo
shumë të njohur, jo shumë të standardizuar: Lee Miller.
Lee Miller nisi karrierën e saj si një ndër modelet e para të Vogue në Amerikën e viteve ’20. Ajo
udhëtoi nëpër kryeqytete të ndryshme, mes tyre edhe Parisi, ku ndërtoi një lidhje të fortë artistike
dhe emocionale me Man Ray, influenca e të cilit është e ndjeshme edhe në fotografitë e saj.
Përveç se modele e Vogue, Lee u shndërrua shpejt në një fotoreportere lufte për të njëjtën revistë;
disa prej artikujve të Vogue mbi fundin e Luftës së Dytë Botërore janë të sajat. Përveç imazheve të
kampeve të përqendrimit, një nga fotografitë më emblematike të veprës së Miller është ajo e
realizuar brenda vaskës së Hitlerit, natyrisht pas çlirimit të qytetit nga forcat aleate.
Në këtë periudhë ku informacionet e luftërave vijnë nga çdo anë, dhe ku së fundmi shumë gazetarë
e fotoreporterë kanë humbur jetën gjatë shërbimit të tyre heroik ndaj së vërtetës dhe informacionit,
zbulimi i pasvdekshëm i Lee Miller është një dritë dhe njëkohësisht një homazh ndaj pasionit dhe
përkushtimit të çdo fotoreporteri e gazetari — veçanërisht i atyre që sot nuk janë më.
“Preferoj të shkrep një foto sesa të jem një fotografi”, ishte shprehur Lee në një nga intervistat e saj,
dhe vërtet, në këtë muze europian, fotografia e saj në heshtjen e sallave dhe respektin e
vizitorëve mbizotëron. Pas çdo imazhi, përveç gruas së bukur dhe udhëtares së palodhur,
shfaqet një dëshmi thellësisht femërore dhe origjinale e një prej ngjarjeve më të hidhura të Evropës.
Përveç se muzë e Man Ray, Lee Miller do të jetë edhe muzë e Jean Cocteau te filmi Le sang d’un
poète. Por mbi të gjitha, pas shumë vitesh dhe një pune të pandërprerë, ajo është sot fotografeja që
muzeumet e mbarë botës kanë nderin ta ekspozojnë në sallat e tyre.
Pas Luftës së Dytë Botërore, Lee Miller u tërhoq nga karriera e fotoreporteres për t’iu përkushtuar
miqësive të saj të shumta. Përvoja e luftës e tronditi thellë, dhe ajo nuk iu rikthye më fotografisë,
duke e zëvendësuar me pasionin e saj për kuzhinën. Deri në ditët e fundit, periudhat e saj të
depresionit alternoheshin me çaste euforie.
Nëse nuk ju rastis të vizitoni ekspozitën e saj, ju ftoj gjithsesi të shfletoni fotografitë online dhe të
shihni filmin që i është dedikuar, “Lee”, me Kate Winslet, me regji të Ellen Kuras.
Leave a comment