Ndërron jetë Ipeshkvi i Sapës, Imzot Simon Kulli

Sot në orët e para të mëngjesit, kleri katolik dhe mbarë komuniteti besimtar u tronditën nga lajmi i ndarjes së papritur nga jeta të Ipeshkvit të Dioqezës së Sapës, Imzot Simon Kulli. Ai u shua si pasojë e një sulmi kardiak, duke lënë pas një boshllëk të madh shpirtëror dhe njerëzor. Imzot Kulli i përkiste brezit të parë të meshtarëve të shuguruar pas periudhës komuniste, një simbol i ringjalljes së jetës kishtare në Shqipëri. Në vitin 2017 ai u emërua Ipeshkëv i Sapës nga Papa Françesku, duke u bërë një figurë e respektuar për përkushtimin, qetësinë dhe ndihmesën e tij në shërbim të Kishës dhe komunitetit. Dioqezat, besimtarët dhe të gjithë ata që e njohën sot ndajnë dhimbjen e humbjes së tij, ndërsa lutjet shtrihen për prindërit, familjen dhe gjithë Dioqezën e Sapës në këtë moment pikëllimi të thellë. Pushofsh në paqe, Imzot Simon Kulli.
Faleminderit për dritën, shërbimin dhe rrugën që le pas.