Bjeshkët këtë vit kishin një zanë të vërtetë: Aurora Lulaj. Në një natë të mbushur me emocion, krenari dhe atmosferë magjike, ajo u kurorëzua me çmimin “Zana e Maleve” në eventin tradicional “Miss Bjeshka 2025”, një nga manifestimet më të dashura kulturore dhe artistike që nderon bukurinë, vlerat dhe trashëgiminë shqiptare.
Me origjinë nga Malësia e Madhe, Aurora mahniti publikun dhe jurinë jo vetëm me pamjen e saj natyrale dhe elegancën e rrallë, por edhe me qëndrimin e saj të përulur, dinjitoz dhe me përfaqësimin autentik të vajzës malësore — krenare për rrënjët dhe kulturën që përfaqëson.
“Ishte një përvojë që do ta mbaj gjithmonë në zemër,” – u shpreh Aurora pas përfundimit të eventit. “Ky çmim nuk është vetëm për mua, por për të gjitha vajzat e Malësisë që rriten me dashuri për vendin, për natyrën dhe për traditat tona.”
Çmimi “Zana e Maleve”, i cili i jepet një konkurrenteje që mishëron bukurinë natyrore, shpirtin fisnik dhe forcën e vajzës shqiptare të veriut, është një nga titujt më të lakmuar të këtij eventi. Këtë vit, ai shkoi në duart e duhura.
Eventi “Miss Bjeshka” po kthehet çdo vit në një platformë jo vetëm për të promovuar bukurinë fizike, por edhe për të ruajtur dhe promovuar trashëgiminë kulturore shqiptare, kostumet tradicionale, këngët dhe vallet e trevave të ndryshme.
Me fitimin e këtij çmimi, Aurora Lulaj u bë simbol i krenarisë për të gjithë ata që besojnë se bukuria e një vajze matet me më shumë se thjesht pamjen – ajo buron nga karakteri, historia dhe lidhja me rrënjët e veta.
Leave a comment