nga: newslibero.com
Një vrasje me armë zjarri ka tronditur qytetin e Elbasanit këtë mbrëmje, duke lënë pas një viktimë të njohur dhe shumë pikëpyetje për autorët dhe motivet. Sipas njoftimeve paraprake, biznesmeni 43-vjeçar, Edmond Mëhalla (i njohur ndryshe si “Mondi Mëhalla”), u qëllua për vdekje rreth orës 21:00 në afërsi të karburantit që dyshohet i përkiste atij në Unazën Jugore të Elbasanit.
Raportohet se Mëhalla ka marrë dy plumba në kokë, ndërkohë që hetuesit dyshojnë se atentati është kryer nga dy persona, të cilët i vunë pritë pranë karburantit. Në vendin e ngjarjes, policia ka ngritur pika kontrolli në të gjitha akset kryesore të qytetit, ndërsa një grup i posaçëm hetimor po merret me identifikimin e autorëve dhe zbardhjen e plotë të dinamikës së krimit. Autorët ende të paidentifikuar zyrtarisht dyshohet se kanë përdorur një automjet tip “Audi” me ngjyrë të zezë, sipas burimeve jozyrtare.
Ky krim vjen vetëm pak kohë pasi autoritetet prezantonin me krenari statistikën për vitin 2024: sipas tyre, në Elbasan nuk ishte regjistruar asnjë vrasje një rekord që zinte vend që nga viti 1989.
Tani, qytetarët ndihen të pasigurt, ndërsa autoritetet thonë se po përqendrojnë forcat për të ndriçuar ngjarjen.
Leave a comment