Gledis Nano fiton përfundimisht gjyqin ndaj qeverisë, Apeli i jep 100 mijë euro dëmshpërblim!

Tiranë, Korrik 2025 – Ish-Drejtori i Përgjithshëm i Policisë së Shtetit, Gledis Nano, ka fituar përfundimisht çështjen gjyqësore kundër Këshillit të Ministrave, pas një vendimi të formës së prerë nga Gjykata Administrative e Apelit.

Çështja nisi në fund të vitit 2022, kur z. Nano u shkarkua nga posti me vendim të Këshillit të Ministrave, me propozim të Ministrit të Brendshëm të asaj kohe, Bledi Çuçi. Vendimi, i motivuar me justifikimin “mosrealizim objektivash”, u kundërshtua nga z. Nano, i cili e konsideroi shkarkimin si të paligjshëm, të pambështetur në ligj dhe në kundërshtim me të drejtat e funksionarëve të lartë publikë.

Pas fitores në Shkallën e Parë, Gjykata e Apelit rrëzoi përfundimisht ankesën e qeverisë dhe la në fuqi vendimin që e shpallte të pavlefshëm shkarkimin e tij. Gjykata vendosi gjithashtu që ish-drejtori të dëmshpërblehet me 60 paga mujore, një shumë që kap vlerën rreth 100 mijë euro, për ndërprerjen e parakohshme të mandatit 5-vjeçar.

Vendimi i Apelit konsiderohet tashmë i formës së prerë, ndërsa burime pranë palëve bëjnë të ditur se çështja mund të shkojë në Gjykatën e Lartë, nëse qeveria vendos të ndjekë rekursin brenda afatit ligjor 30-ditor.

Ky vendim përbën një precedent të rëndësishëm ligjor për trajtimin e funksionarëve të emëruar me vendim qeveritar dhe ngre pyetje mbi standardet e ndjekura në vendimmarrjet politike.

Z. Nano, i cili ka shërbyer më parë edhe në strukturat e sigurisë dhe antiterrorit, përflitet së fundmi si kandidat për pozicione kyçe në sektorin e drejtësisë dhe sigurisë kombëtare.