Nga: Sindi kasalla
Korespodentia: Newslibero.com
Në historinë shqiptare, figura e Gjergj Kastriotit Skënderbeut njihet jo vetëm si komandant i pamposhtur i betejave kundër Perandorisë Osmane, por edhe si një udhëheqës i zgjuar që kuptoi fuqinë e diplomacisë. Në zemër të kësaj strategjie qëndronte Kancelaria e jashtme, një institucion shtetëror që luajti rol vendimtar në lidhjet ndërkombëtare të Principatës së tij.
Kancelaria e jashtme ishte përgjegjëse për zhvillimin e politikës së jashtme të shtetit të Skënderbeut dhe të Lidhjes Shqiptare të Lezhës. Ajo organizonte dhe dërgonte misione diplomatike në mbretëri dhe principata të tjera evropiane, me qëllim sigurimin e mbështetjes politike, ushtarake dhe ekonomike kundër pushtimit osman.
Aleatët kryesorë të Skënderbeut në këtë drejtim ishin:
Mbretëria e Napolit
Republika e Venedikut
Papatin në Romë
Mbretëria e Hungarisë
Një shembull i shkëlqyer është traktati i vitit 1451 me Mbretin Alfons V të Napolit, i cili i siguroi Skënderbeut ndihmë ushtarake në këmbim të një aleance të ngushtë politike.
Gjuha diplomatike dhe njerëzit e kancelarisë
Për të komunikuar me oborret evropiane, kancelaria përdorte latinishten dhe italishten, gjuhë zyrtare të diplomacisë së kohës. Në krye të saj qëndronin sekretarë dhe shkrues të shkolluar jashtë vendit, të cilët kishin njohuri të thella juridike dhe politike.
Një ndër figurat më të njohura ishte Pal Engjëlli, bashkëpunëtor i ngushtë i Skënderbeut dhe një figurë e rëndësishme kishtare.
Përveç dërgimit të ambasadorëve dhe përfaqësuesve, kancelaria ruante me kujdes traktatet, marrëveshjet dhe gjithë dokumentacionin diplomatik. Ky organizim i mirëadministruar i dha Skënderbeut një avantazh të madh: Evropa e njihte si një udhëheqës të fuqishëm dhe të respektuar, jo thjesht një prijës lokal.
Kancelaria e jashtme e Skënderbeut mbetet një dëshmi e qartë se fuqia e një shteti nuk qëndron vetëm në armë, por edhe në diplomaci dhe aleanca. Falë këtij institucioni, Skënderbeu arriti ta mbrojë vendin për më shumë se dy dekada, duke e vendosur Shqipërinë në hartën politike të Europës së shekullit XV.
Ky shkrim është pjesë e rubrikës “Historia Shqiptare” nga Newslibero.com
Leave a comment