Koha i dha të drejtë Bashës Denoncimet që u tallën, sot bëhen realitet

Në rrjetin e saj në Facebook, koordinatorja e Lulzim Bashës dhe njëkohësisht një nga drejtueset e Partisë Euroatlantike, Zana Doda, ka reaguar duke theksuar se koha po i vërteton një më një të gjitha denoncimet që Basha ka bërë ndër vite.
Sipas Dodës, shumë nga akuzat që dikur janë pritur me dyshim, sot po dalin të jenë të bazuara në prova dhe fakte konkrete. Ajo nënvizon se ndër denoncimet që po marrin konfirmim publik është edhe ai ndaj zonjës Belinda Balluku, ku Basha kishte paralajmëruar prej kohësh për shkelje, abuzime me pushtetin dhe keqmenaxhim.
Me zhvillimet e fundit, Doda thekson se është e qartë se paralajmërimet e Bashës nuk kanë qenë retorikë politike, por sinjalizime serioze të mbështetura në informacion të saktë. Sipas saj, drejtësia vonon, por nuk harron, dhe e vërteta po del në dritë pavarësisht përpjekjeve për ta mbuluar.
“E vërteta ecën ngadalë, por gjithmonë arrin në destinacion,” shprehet ajo, duke i bërë thirrje institucioneve të thellojnë hetimet dhe të veprojnë me përgjegjësi.