Asgjë për t’u krenuar. Asnjë përgjegjësi për 12 vite dështime, asgjë për problemet e përditshme të shqiptarëve, koston e lartë të jetesës, pamundësitë ekonomike, mungesën e ilaçeve, pensionet e ulëta, arsimin e degraduar. Asnjë llogaridhënie.
Asgjë për shqiptarët, vetëm pushtet për veten dhe miqtë e tij!
Asnjë ministër i vjetër, asnjë i ri nuk do të zgjidhë asnjë nga këto probleme. E vetmja gjë që do të bëjnë është të zgjasin edhe më shumë qëndrimin e Edi Ramës në pushtet.
Të dashur miq, ky është një moment reflektimi. Shqipëria ka nevojë për një ndryshim të vërtetë. Rama nuk ikën vetë.
E vetmja rrugë është guximi ynë. Të mos dorëzohemi! Të ofrojmë një alternativë të ndershme, morale, të kundërt me modelin e tij të korruptuar.
E kuptoj zhgënjimin e opozitarëve, demokratëve, qytetarëve të thjeshtë. E kuptoj padurimin e atyre që kanë vuajtur pasojat e keqqeverisjes, por Rama nuk rrëzohet me të njëjtat vendime të djeshme.
Brenda pak javësh, Tirana do të ketë zgjedhje vendore. Ky është shansi i opozitës për t’u bashkuar rreth një kandidati të vetëm. Jo kandidati i partive, por një personalitet i ndershëm e i besueshëm sepse shqiptarët janë të etur për ndryshim!
Fitorja në Tiranë do të ishte pika e kthesës dhe kthesa duhet të nisë që sot!
Leave a comment