Tiranë, 25 Gusht 2025 – Presidenti i Ukrainës, Volodymyr Zelensky, ka nderuar Kryetaren e Kuvendit të Shqipërisë, znj. Elisa Spiropali, me Urdhrin “Shën Olga”, Klasi i Parë, një nga vlerësimet më të larta shtetërore të Ukrainës, me rastin e Ditës së Pavarësisë së vendit.
Në një letër falënderimi drejtuar Presidentit Zelensky, znj. Spiropali e cilësoi këtë dekoratë si një nder të jashtëzakonshëm dhe një shenjë vlerësimi për qëndrimin konsekuent dhe të palëkundur të Shqipërisë përkrah Ukrainës në përballje me agresionin rus.
“Ky vlerësim në emrin tim është mbi të gjitha shenjë respekti për kontributin dhe qëndrimin e palëkundur të Shqipërisë krah Ukrainës në këtë kohë të vështirë”, shkruan Kryetarja e Kuvendit.
Znj. Spiropali theksoi se Kuvendi i Shqipërisë, bashkë me të gjitha institucionet dhe popullin shqiptar, mbeten të bashkuar dhe të vendosur në mbështetje të plotë për Ukrainën dhe të drejtën e saj për liri, sovranitet dhe vetëvendosje.
“Ky qëndrim buron nga zemra e çdo qytetari shqiptar, nga besimi ynë tek liria, dinjiteti dhe e drejta e një kombi për të jetuar i pavarur dhe për të vendosur vetë për të ardhmen e tij,” nënvizon ajo në letrën drejtuar Presidentit ukrainas.
Kryetarja e Kuvendit rikonfirmoi përkushtimin e Shqipërisë për të mbështetur të gjitha përpjekjet ndërkombëtare për vendosjen e një paqeje të drejtë dhe të qëndrueshme në Ukrainë, në bashkëpunim me Shtetet e Bashkuara, Bashkimin Evropian, NATO-n dhe partnerët demokratikë.
Letra mbyllet me një mesazh shprese dhe besimi të fortë për fitoren e Ukrainës!
“Uroj dhe besoj vendosmërisht se shumë shpejt do të festojmë fitoren e plotë të Ukrainës ndaj agresorit.”
Leave a comment