SHBA shton presionin ndaj krimit të organizuar në Shqipëri

Tiranë: Mesazhi i parë i Chargé d’Affaires së SHBA-ve në Shqipëri, Nancy VanHorn, drejtuar qeverisë shqiptare ishte e qartë: lufta kundër karteleve dhe grupeve kriminale nuk është thjesht prioritet vendor, por një çështje sigurie kombëtare dhe ndërkombëtare. Në takimin e saj të parë me Ministren e re të Punëve të Brendshme, Albana Koçiu, diplomatja amerikane theksoi se Presidenti Donald Trump mbetet i vendosur për çrrënjosjen e organizatave kriminale transnacionale. “Vetëm përmes bashkëpunimit të ngushtë mes forcave të rendit të SHBA-së dhe Shqipërisë mund të çmontojmë rrjetet financiare të paligjshme dhe t’u mohojmë trafikantëve e terroristëve strehimin e sigurt,” u shpreh VanHorn. Deklaratat e saj vijnë në një moment kur Shqipëria vazhdon të përballet me sfida të mëdha në luftën kundër trafikut të drogës dhe pastrimit të parave. Raporte ndërkombëtare kanë theksuar shpesh se vendi përdoret si një nyje tranziti për kanabisin, kokainën dhe heroinën, duke ushqyer rrjete kriminale që operojnë në disa shtete të BE-së. Ministrja Koçiu, e cila sapo ka marrë detyrën, u shfaq e vendosur për të rritur intensitetin e përpjekjeve në këtë drejtim. Partneriteti me SHBA është një garanci e fuqishme për rritjen e kapaciteteve tona në luftën kundër krimit të organizuar. Shqipëria nuk mund ta përballojë e vetme këtë betejë, por me aleatët tanë mund të arrijmë rezultate konkrete, deklaroi ajo.Sipas ekspertëve të sigurisë, theksi mbi çmontimin e rrjeteve financiare është një sinjal se përveç operacioneve policore, pritet intensifikim i hetimeve mbi pasuritë e paligjshme dhe mekanizmat e pastrimit të parave. Kjo pritet të prekë jo vetëm grupet kriminale, por edhe lidhjet e tyre me biznesin dhe politikën.Takimi VanHorn&Koçiu është parë si një mesazh i fortë diplomatik që SHBA nuk do të tolerojë që Shqipëria të shërbejë si terren i sigurt për krimin e organizuar dhe trafikantët ndërkombëtarë. Tashmë mbetet për t’u parë se sa shpejt këto angazhime do të përkthehen në aksione konkrete.