Tiranë Dy të rinj shqiptarë, Flavio Skoti dhe Dea Basha, janë rikthyer së fundmi në Shqipëri të frymëzuar dhe të pajisur me njohuritë më të fundit në fushën e teknologjisë dhe inxhinierisë softuerike, të fituara gjatë pjesëmarrjes së tyre në programin ndërkombëtar Global Undergraduate Exchange Program (Global UGRAD) në Shtetet e Bashkuara të Amerikës.
Ky program, që ofrohet nga Departamenti i Shtetit Amerikan, i jep mundësi studentëve nga e gjithë bota të studiojnë për një semestër në një universitet amerikan, duke përfshirë përvojë akademike, kulturore dhe praktike. Për Flavion dhe Dean, kjo ishte më shumë se një përvojë studimi ishte një udhëtim që ndryshoi rrënjësisht rrugëtimin e tyre profesional dhe personal.
Një përvojë që të ndryshon jetën?
Flavio Skoti, i cili studioi shkenca kompjuterike në Georgia College & State University, tregon se koha në SHBA e ndihmoi të thellojë njohuritë teknike dhe të kuptojë më mirë tregun global të teknologjisë. “Ajo që më impresionoi më shumë ishte qasja praktike dhe bashkëpunuese në mësim, si dhe mundësia për të bashkëpunuar me profesorë dhe studentë nga kultura të ndryshme,” thotë Flavio.
Dea Basha, e cila ndoqi inxhinieri softueri në Bluefield State University, thekson dimensionin transformues të programit. “Ishte një përvojë e jashtëzakonshme dhe që të ndryshon jetën,” thotë ajo. Mësova jo vetëm për teknologjinë, por edhe për veten time, çfarë dua të arrij dhe si mund të kontribuoj më mirë në vendin tim.”
Njohuri që kthehen në shërbim të vendit!
Rikthimi i tyre në Shqipëri nuk është thjesht një kthim në shtëpi, por një angazhim për të përdorur dijen dhe përvojën ndërkombëtare për të kontribuar në zhvillimin teknologjik të vendit. Të dy janë të përfshirë në iniciativa të ndryshme që mbështesin të rinjtë në teknologji, mentorim, dhe zhvillimin e projekteve të reja në sektorin digjital.
Shqipëria ka potencial të jashtëzakonshëm në fushën e teknologjisë, veçanërisht te të rinjtë. Na duhet vetëm më shumë mbështetje, mundësi dhe një mentalitet që inkurajon kreativitetin dhe sipërmarrjen,” thekson Dea.
Partneritet që sjell zhvillim?
Ky është vetëm një shembull se si partneriteti ndërmjet Shqipërisë dhe Shteteve të Bashkuara të Amerikës sjell rezultate konkrete në nivel individual dhe kombëtar. Si një lider global në teknologji dhe inovacion, SHBA mbetet një partner kyç për Shqipërinë në zhvillimin e arsimit, ekonomisë digjitale dhe fuqizimin e të rinjve.
Programet si Global UGRAD janë dëshmi e këtij bashkëpunimi të suksesshëm dhe vazhdojnë të krijojnë ura miqësie dhe mundësish ndërmjet dy vendeve.
Leave a comment