Shoqata “Emigranti” Patra dhe Shkolla Shqipe “Naim Frashëri” Patra shënuan me sukses një tjetër aktivitet artistiko-kulturor me tematikë “Të njihemi me veprat e autorëve tanë”, duke sjellë përpara publikut një ngjarje të veçantë për diasporën shqiptare në Greqi.
Në qendër të këtij eventi ishte promovimi i librit me poezi “PËRMBI GURË ÇELIN FJALË” të autores Vllasova Musta, e ardhur enkas nga Shqipëria. Vepra u prezantua edhe në gjuhën greke, falë përkthimit të realizuar me ndjeshmëri dhe profesionalizëm nga z. Iliaz Bobaj, duke e bërë poezinë të prekshme dhe të kuptueshme për të dy komunitetet.
Aktiviteti u zhvillua më 15 Nëntor 2025, ditë e shtunë, në orën 18:00, në ambientet e Theatraqi Marinas, Patra (kati i dytë). Salla, e mbushur me ngrohtësi, dije dhe dashuri për kulturën, u kthye në një hapësirë dialogu letrar e artistik.
Programi i pasur dhe me plot surpriza solli para publikut një vepër me vlera të spikatura letrare në të dyja gjuhët, shqip dhe greqisht, duke dëshmuar se letërsia është një urë e fortë bashkimi mes kulturave.
Në emër të Shoqatës “Emigranti” Patra, kryetarja znj. Kristiana Veliu falënderoi përzemërsisht autoren Vllasova Musta dhe përkthyesin Iliaz Bobaj për këtë vepër të çmuar, duke u uruar jetë të gjatë dhe suksese të vazhdueshme në rrugëtimin e tyre krijues.
Leave a comment