Shkodër, 26 qershor 2025 – Në ambientet e Universitetit të Shkodrës “Luigj Gurakuqi” u nënshkrua sot marrëveshja e bashkëpunimit me Autoritetin për Informimin mbi Dokumentet e ish-Sigurimit të Shtetit (AIDSSH). Marrëveshja u firmos nga Rektori i Universitetit, Prof. Dr. Tonin Gjuraj, dhe Kryetarja e AIDSSH, znj. Gentiana Sula, e cila zhvilloi një vizitë zyrtare në universitet së bashku me ekipin e saj.
Ky bashkëpunim është rezultat i takimit të mëparshëm të zhvilluar më 3 qershor në Tiranë dhe ka për qëllim forcimin e lidhjeve ndërinstitucionale në fushën akademike, historike dhe qytetare.
Marrëveshja përfshin këto pika kyçe:
Qasje në dokumente arkivore – Studentët dhe pedagogët do të kenë të drejtë të kërkojnë dhe përdorin dokumente nga arkivat e ish-Sigurimit të Shtetit për qëllime studimore dhe kërkimore.
Mbështetje infrastrukturore – Të dy institucionet do të ofrojnë hapësira për zhvillimin e aktiviteteve të përbashkëta shkencore, kulturore dhe edukative.
Përfshirja aktive e studentëve – Studentët do të angazhohen në transkriptimin, analizimin dhe dokumentimin e dëshmive historike.
Tematika studimore – Do të nxiten temat e Masterit dhe Doktoratës që trajtojnë periudhën e diktaturës, bazuar në dokumente arkivore.
Asistencë teknike dhe akademike – Universiteti do të ofrojë mbështetje profesionale për projektet e zhvilluara në kuadër të kësaj marrëveshjeje.
Koordinim dhe pjesëmarrje – Sigurohet angazhim i vazhdueshëm i komunitetit universitar në të gjitha aktivitetet e përbashkëta.
Promovim institucional – Të dy institucionet angazhohen për pasqyrimin e bashkëpunimit në media dhe rrjetet sociale.
Ky bashkëpunim i rëndësishëm pritet të sjellë mundësi të reja akademike dhe kërkimore për studentët dhe stafin, veçanërisht në Fakultetin e Shkencave Shoqërore, Fakultetin e Shkencave të Edukimit dhe Fakultetin e Drejtësisë, duke e shndërruar dokumentimin historik në një mjet të fuqishëm për edukim dhe reflektim qytetar.
Leave a comment